علي اسم مصر ... التاريخ يقدر يقول ما شاء
أنا مصر عندي أحب و أجمل الاشياء
بحبها و هي مالكة الارض شرق و غرب
بحبها و هي مرمية جريحة حرب
بحبها بعنف و رقة و علي استحياء
وأكرها و ألعن أبوها بعشق زي الداء
و اسيبها و أطفش في درب و تبقي هي في درب
و تلتفت تلاقيني جنبها في الكرب
و النبض ينفض عروقي بألف نغمة و ضرب
علي اسم مصر ... التاريخ يقدر يقول ما شاء
مصر النسيم في الليالي و بياعين الفل
و مراية بهتانة علي القهوة ازورها و أطل
ألقي النديم طل من مطرح ما أنا طليت
و الاقها برواز معلق عندنا في البيت
فيه القمر "مصطفي كامل" حبيب الكل
المصري باشا بشورابه اللي ماعرفه الذل
و مصر فوق في الفرندة و اسمها جيوليوت
و لما جيت بعد رميو بربع قرن بكيت
و مسحت دموعي في كمي و من ساعتها وعيت
علي اسم مصر
